Posted on Leave a comment

Studie hulp: Hoekom is leerstyl belangrik?

Leer kan oorweldigend raak.  Werk is baie en tyd is min.  Soms spandeer leerders ure lank om te leer, maar kom eksamen tyd, dan bereik hulle glad nie hulle potensiaal nie.  Daar kan verskeie redes wees hiervoor.  Een daarvan is dat die leerder nie bewus is van sy of haar leerstyl nie.  Om te leer volgens jou leerstyl is van kardinale belang.

Daar is 3 tipes leerstyle:  Visueel, ouditief en kineties.  Elke leerstyl het unieke karakter eienskappe en voor- en nadele.  Geen leerstyl is beter as die ander een nie.  Die belangrike is om te weet WAT jou leerstyl is.

Leerders wat bewus is van hulle leerstyl, is geneig om vinniger en meer effektief te studeer.  ‘n Ouditiewe leerder wat byvoorbeeld saggies deur sy werk lees, gaan minder suksesvol wees as die ouditiewe leerder wat sy werk hardop herhaal.  Die visuele leerder wat net uit die handboek se swart en wit bladsye leer, gaan sukkel om sy werk sinvol te onthou, terwyl die visuele leerder wat kleurvolle opsommings maak, geneig sal wees om sy werk makliker te herroep. 

Wanneer ‘n ouer bewus is van die feit dat sy kind ‘n kinetiese leerder is, sal hy minder gefrustreerd raak indien die kind nie kan stilsit terwyl hy leer nie.  Die kinetiese leerder moet beweeg wanneer hy leer en leer die beste deur te doen.  

Beperkings

Elke leerstyl het ook sy beperkinge.  Daarmee word bedoel dat daar in elke leerstyl sekere dinge is wat vermy moet word ten einde die maksimum uit studie tyd te kry. Die ouditiewe leerder moet byvoorbeeld in ‘n stil vertrek leer, terwyl die visuele leerder liefs nie voor ‘n venster moet sit en leer nie.  Die kinetiese leerder moet nie gedwing word om doodstil te sit wanneer hy leer nie.  

So wat is my leerstyl?

Die eerste stap om jou kind te kry om sy volle akademiese potensiaal te bereik, is dus om ‘n leerstyltoets te doen.  Daarna kan die kind leer hoe om sinvol te studeer op grond van sy leerstyl.  Kliek op die skakel hieronder om ons werkswinkel by te woon en uit te vind wat jou kind se leerstyl is. 

Leave a Reply

Your email address will not be published. Required fields are marked *